بحبّك أنا
كِبْرت وصار الحُبّ يشغل بالها..........وهَمْس الغزل زوّق رْياش حْجالها
وصار العشق ينْبُت زنابق عالطّريق..........مطرح ما يمرق عالطّريق خيالها
وملّ الهوى.. وما ملّت من الإنتظار..........حتّى بشمس الوعْد لوّحها النّهار
وصارت إن وقْفِت عالمرايِة شي نهار..........من سِحِرها.. تطقّ المراية قبالها
وتنهّد الشَّعر البِلوْن الكستنا..........عاكتافها.. وضحكوا المواسم للجنا
وكم ألف عاشق كلمِة بحبّك أنا..........ماتت عا تمّو.. وما استرجى قالها
*************************
مخدّتك
مَرَقْت عْلى غرفة نومك مرور الفقير..........عا غرفة الإلماس بغياب الأمير
سألتْ المراية والمشط عنّك كتير..........والشّال. والمنديل. والتّوب القصير
وصرْت رشرش عا فَساتينك عبير..........وطوّل شراشف غيرتي ولفّ السّرير
وخلّيت زهرة غافية عا مخدتك..........مطرح ما بتغَفّي الحرير على الحرير
*************************
هيك قالتلي
نْطرتَك وعد عا جْوانح عصافير..........وضلّيتْ طول اللّيل سهرانة
حسّ الحرير بفرشتي مْسامير..........وإتقلّب على الجمر بردانة
وصَوتك يْقِلّي ما بقى بكّير..........من دربِك الإيّام هربانة
وتوْصل.. وشوف الكون صار زْغير..........وتجلِّد الكلمة على لساني
ومنْ عُبّك تشيل القلم.. وتصير..........تِكتُبْ شِعر عا زرار فستاني
***************
بتمني انو كلكن تحبو بصدق
السبت مايو 12, 2018 8:41 am من طرف اسير الغربه
اليومية
موضوع: حوارغزال بيني وبين حبيبتي 
