معتقدات شامية ..

معتقدات شاميه







* اذا انكسرت كاسة بيقولوا: انكسر الشر (تقولوا الشر مخلوق من الزجاج)

تعليقي الشخصي:

هادا من لطفهم وذوقهم .. إنو يكون شي ضيف مثلاً كشر الكاسة مشان ما ينحرج من حاله بيقولوله هيك .. او إذا شي صغير كسرها مشان ما ياكل رعبه من شي قتله .. ولك دخيل ربي اللطف أنا





* اذا مر حدا فوق الطفل ما بقا يطول ( انو اذا طفل صغير متسطّح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!!

تعليقي الشخصي:

بس إذا مرت بنت فوق الطفل فيه مشكلة ... إذا صبي مر فوق صبي عادية

(بيقولوا الشوام بعد ما تمرق البنت : وليه لا بأ تمرئي من فوق حدا .. مرت حيّة ولا مرت بنيّه)

يعني أن تمرق أفعى أهون وأفضل من أن تمرق بنت فوق شي ولد






* قص الاظافر بالليل مو منيح (لا تسألو ليش ما بعرف ولا حدا بيعرف بس مو منيح و خلص )

تعليقي الشخصي:

في اعتقاد قديم إنو قص الأظافر بالليل بيأذي الجن يلي بتكتر طلعاتهم بالليل ... وبس







* مراششة الميه فراق (ما بصير حدا يرش رفيقو بالمي لان بعدين بيتفرقوا اي شو عم يرشه بالزيت كاز )

تعليقي الشخصي:

مو بس عند الشوام هي يا فهمان ... ما سمعت غنية نجوى كرم اللبنانية ..

المي فراق .. لا ترميني ...!!!








* اذا اجت الكندرة فوق الكندرة يعني رايحين مشوار (واذا اجت تحتها يعني راجعين من المشوار ؟؟!!)

تعليقي الشخصي:

من وين طلعت فيها هي حبيب .. أول مرة بسمعها .. !!



* اذا زحف الولد او زقزقت العصافير معناها جاينا ضيوف (وبهيك حالة لازم توقفوا ورى الباب لانهم بكونوا طالعين عالدرج)

تعليقي الشخصي:

هي معروفة بالاستقراء ... جربوها ... وحطولكم شي ولد كبير وخلوه يزحف ..

ورح تلاقوني شخصياً بوشكم





*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل (واذا طنوا مع بعض معناتها طرشت عليك العوض)



* اذا رفت عيني اليمين بيكون جاينا خبر طريف

*اذا رفت عيني الشمال بيكون جاينا خبر مو منيح (اما اذا رفوا سوى فأنت اكيد احول)



كلااااااام جميل .. كلااااااام معقول ... وما قدرش قول حاجة عنه






* اذا حكني حاجبي معناها بدنا نستقبل حدا جاي من السفر








*إذا حكني كفي اليمين معناها بدي أقبض مصاري








* و ما بصير الحمام بالليل (طبعا شي بديهي لأن اكيد المي بتكون مقطوعة)



الحمام بالليل ما بيصير لأنه حضرتك رح تكب مي سخنة على الأرض .. وتأذيلك شي جني من يلي معسكرين بحمام بيتكم ... فرح يأذيك .. لهيك يا حبيب بلالك ياها







*واذا شفت مقص مفتوح لازم فورا تسكرو ( لانو المقص الفاتح تمو بيعمل خناق )






*وإذا عمل العصفور تحتو على الأواعي يعني جاييكون رزقة (وما لازم تغسل ملابسك شي سنة مشان الرزقة)





*و دلق القهوة رزقة وكمان نفس الحكي خليها مدلوقة لا تمسحها





*و شرب المي بعد القهوة قلة زوء (حتى لو اتشردقت موت ولا تشرب مي )



طبعاً قلة ذوء .. معناها هالحركة عم تقول لأهل البيت .. تضربوا انتوا وأهوتكم ..

وهالشي عييييييب







* كمان يلي حامل بصبي بتتباشع واذا حامل ببنت بتحلا





* وإذا الطفل قعد بالصينية وهي عالأرض بيرتعبوا لأنه هاد الولد رح يضيع (ويمكن يتشرد هاد اذا ما طلع حرامي كمان )






* و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة هدا دليل على انو هالشخص ناقص





*واذا عندك ضيف اتقيل دم وبدك يروح من عندك على السريع شك دبووس او عدة دبابيس بأيد المقشة او اقرأ سورة الزلزلة (بس اكيد في عالم اذا بتقرأ القرأن كله بيضلوا لزقة فلا تحاول)







*والي بيعدّ النجوم بيطلعلو تالولات بايدو (بس اذا حسن يحصيهم ما بيطلع شي)






*وبعد ما نخلص صلاة نطوي السجادة مشان الشيطان ما يصلي عليها (خلّيه يصلّي بلكي يتوب ويصير يوسوسلنا بالخير!!)